Real Madridi ka një plan të veçantë për ta ndihmuar Kylian Mbappen të fitojë “Topin e Artë” këtë vit, në një garë të fortë për çmimin prestigjioz individual.

Superylli francez është një nga favoritët kryesorë për këtë çmim, ndërsa në garë janë edhe sulmuesi i Bayern Munichut, Harry Kane, dhe ylli i Barcelonës, Lamine Yamal.

Sipas raportimeve, Madridi dëshiron që ylli i tij kryesor ta fitojë Topin e Artë dhe planifikon t’i ofrojë ekspozim të madh dhe mbështetje publike gjatë javëve të ardhshme, me synimin për t’ia rritur shanset për triumf.

Një raport i “L’Équipe” bën të ditur se gjiganti spanjoll ka nisur një plan të veçantë në prag të ceremonisë, përmes të cilit legjendat e klubit do të flasin vazhdimisht për arsyet pse Mbappe e meriton çmimin.

Madridi kishte ndjekur një qasje të ngjashme edhe në vitin 2013, kur Alfredo Di Stefano, Emilio Butragueno, Carlo Ancelotti, Iker Casillas dhe Sergio Ramos e mbështetën publikisht Cristiano Ronaldon për “Topin e Artë”.

Ronaldo në fund e fitoi çmimin, duke lënë pas dyshen e Bayern Munichut, Franck Ribery dhe Arjen Robben. Madridi raportohet se shpreson që një fushatë e ngjashme ta ndihmojë Mbappen të dalë përpara Kane dhe Yamalit në garën për trofeun.

Kuotat e fundit të kompanive të basteve e rendisin Kane si favorit, ndërsa Yamal vjen pas tij dhe Mbappe renditet në vendin e tretë. Kane realizoi 61 gola për Bayern Munichun gjatë sezonit 2025/26, duke luajtur rol të rëndësishëm në sukseset e skuadrës.

“Topi i Artë” ndahet çdo vit nga revista “France Football” për futbollistin që vlerësohet si më i miri në botë gjatë sezonit.

Fituesi përcaktohet përmes votimit të gazetarëve. “France Football” dhe “L’Équipe” përpilojnë fillimisht një listë me 30 kandidatë.

Më pas, nga secili prej 100 shteteve me renditjen më të lartë në FIFA, një gazetar i përzgjedhur voton për 10 lojtarët më të mirë, duke u dhënë pikë në bazë të renditjes.

Gjatë votimit merren parasysh tri kritere kryesore: paraqitjet individuale gjatë sezonit, sukseset e skuadrës dhe arritjet në nivel klubesh dhe ndërkombëtar, si dhe loja e ndershme.

Pasi të dorëzohen të gjitha votat, pikët mblidhen dhe lojtarët renditen sipas totalit. Në rast barazimi, fitues shpallet lojtari që ka marrë më shumë vota të vendit të parë.