Më shumë se 1 000 fëmijë kanë vdekur nga një shpërthim i fruthit në Bangladesh, ku rastet po rriten sërish pavarësisht një fushate emergjente vaksinimi.

Më shumë se 19.8 milionë fëmijë në vend janë vaksinuar tashmë, por rreth 1,000 raste të reja të dyshuara po raportohen çdo ditë.

UNICEF-i i tha BBC-së se më 26 shtator, qeveria do të kalojë në një “fazë të intensifikuar” të fushatës për të arritur fëmijët që ende nuk janë vaksinuar, raporton BBC.

Deri në mars të këtij viti, Bangladeshi kishte bërë “përparim të konsiderueshëm” drejt eliminimit të fruthit, sipas Organizatës Botërore të Shëndetësisë (OBSH). Por të dhënat e OBSH-së tregojnë tani se Bangladeshi ka regjistruar më shumë raste të fruthit se çdo vend tjetër në botë këtë vit.

Sipas shifrave më të fundit të qeverisë, që nga marsi janë regjistruar më shumë se 194,000 raste të kësaj sëmundjeje shumë ngjitëse, e cila përhapet lehtësisht përmes frymëmarrjes, kollitjes ose teshtitjes.

Vetëm të martën, tetë persona të tjerë vdiqën me dyshimin se ishin prekur nga fruthi.

Në këtë vend të Azisë Jugore, me një popullsi prej rreth 178 milionë banorësh, rastet e fruthit u rritën ndjeshëm në mars. UNICEF-i e përshkroi shpërthimin fillestar si një “stuhi të përsosur” të disa faktorëve, përfshirë dendësinë e lartë të popullsisë dhe faktin se pandemia COVID-19 kishte vonuar vaksinimin rutinë.

Agjencia e OKB-së kishte deklaruar më herët se qeveria e Muhammad Yunus, ish-udhëheqësit të përkohshëm të Bangladeshit, kishte vonuar porositjen e vaksinave vitin e kaluar, duke shkaktuar mungesa.