Deputeti i Aleancës, Burim Ramadani, ka reaguar pas vendimit të Gjykatës Kushtetuese lidhur me afatet për konstituimin e Kuvendit dhe procesin e zgjedhjes së Presidentit të Kosovës.

Ramadani ka thënë se Gjykata Kushtetuese ka konstatuar se Kuvendi është konstituuar pas skadimit të afatit 30-ditor, duke theksuar se vendimi përcakton edhe pasojat kushtetuese të këtij tejkalimi.

“U dështoi loja pushtetarëve! Le ta mësojnë këta pushtetarët: Kushtetuta nuk është copë letre këshilluese dhe afatet kushtetuese nuk janë dekor”, ka shkruar Ramadani në “Facebook”.

Ai ka deklaruar se deri më 6 tetor duhet të zgjidhet presidenti ose vendi të shkojë në zgjedhje.

“Deri më 6 tetor ose zgjidhet Presidenti ose shkohet në zgjedhje”, ka shkruar Ramadani

Ramadani ka pretenduar gjithashtu se veprimet e ndërmarra nga 8 gushti deri më 13 shtator janë rrëzuar nga Gjykata Kushtetuese.

“Krejt çka kanë bërë nga 8 gushti e deri më 13 shtator, Gjykata ua hodhi poshtë!”, ka shkruar Ramadani.