Qindra protestues kanë ngritur kampe me tenda në sheshet qendrore të Lisbonës dhe Portos, në Portugali, për të kundërshtuar rritjen e çmimeve të banesave dhe kostos së jetesës, raportoi transmetuesi publik RTP.

Protestuesit u vendosën në kampe të improvizuara të dielën, pas zhvillimit të tubimeve në dy qytetet kryesore.

Policia, e cila kishte shpërndarë me forcë një kamp proteste në Porto në fillim të javës, fillimisht nuk ndërhyri.

Përmes fletëpalosjeve të shpërndara gjatë protestave, demonstruesit kërkuan shfuqizimin e ligjit për reformën e qirave, të miratuar nga partitë e djathta, ndalimin e blerjes së apartamenteve nga fondet e investimeve në prona, vendosjen e një tavani për qiratë dhe rritjen e ndërtimit të banesave publike.

Ata kërkuan gjithashtu ndalimin e dëbimeve të detyruara të personave që nuk kanë një alternativë tjetër strehimi, si dhe rinovimin e apartamenteve të pabanuara në pronësi të shtetit.

Sipas Institutit Kombëtar të Statistikave të Portugalisë (INE), qiratë dhe çmimet e pronave janë rritur afërsisht trefish gjatë 10 viteve të fundit.

Analizat e fundit tregojnë se një nga faktorët që ka ndikuar në këtë situatë është mungesa e rreth 300 mijë banesave.

Ndërkohë, pagat reale janë rritur me vetëm rreth 16% gjatë së njëjtës periudhë, duke thelluar vështirësitë e qytetarëve për të përballuar kostot e strehimit.