Kim Jong Un është shfaqur në mediat shtetërore të Koresë së Veriut duke u dukur jashtëzakonisht mirë për një njeri për të cilin është përfolur se ka vdekur nga një hemorragji cerebrale, shkruan BBC.

Fotografitë e publikuara nga gazeta shtetërore Redong Sinmun tregojnë diktatorin 42-vjeçar duke vizituar, së bashku me të bijën, atë që gazeta e përshkroi si një ekspozitë të veshjeve dhe këpucëve.

Pamjet u shfaqën disa orë pasi një disident kinez që jeton në SHBA pretendoi, pa paraqitur prova, se Kim ishte dërguar në një spital në Pekin në gjendje kome dhe kishte vdekur.

Për ata që e ndjekin nga afër Korenë e Veriut, ky lloj thashethemi është bërë pothuajse rutinë.

Në një nga shtetet më të mbyllura në botë, faktet shpesh janë të vështira për t’u verifikuar, duke krijuar terren pjellor për spekulime.

Ky pretendim i fundit e ka origjinën nga Wanjun Xie, i cili e identifikon veten si kryetar i Partisë Demokratike Kineze, një grup i ndaluar nga autoritetet kineze. Ai ka përhapur më parë pretendime të paverifikuara, përfshirë spekulime për vdekjen e liderit kinez Xi Jinping.

Xie pretendoi se Kim kishte pësuar një hemorragji të rëndë cerebrale dhe ishte transferuar në Pekin, sepse Koresë së Veriut i mungonin kapacitetet mjekësore për ta trajtuar.

Ai pretendoi se Kim më pas kishte vdekur dhe se trupi i tij ishte kthyer fshehurazi në Korenë e Veriut, ndërsa regjimi po e fshihte vdekjen e tij.