Biblioteka Kombëtare e Kosovës “Pjetër Bogdani” dhe Biblioteka Kombëtare Széchényi e Hungarisë kanë nënshkruar memorandumin e mirëkuptimit me qëllim të forcimit të bashkëpunimit përmes projekteve të përbashkëta kulturore, shkëmbimit të stafit dhe trajnimeve profesionale në fushën e digjitalizimit.

Ky bashkëpunim është bërë i mundur falë angazhimit të ambasadorit të Republikës së Kosovës në Hungari, Delfin Pllana.

Memorandumi është nënshkruar nga drejtoresha e përgjithshme e Bibliotekës Kombëtare të Kosovës, Blerina Rogova Gaxha, dhe drejtoresha e përgjithshme e Bibliotekës Kombëtare Széchényi, Judit Gerencsér.

Në takim, përveç përfaqësuesve të dy institucioneve, morën pjesë edhe sekretari i Ministrisë së Kulturës dhe Turizmit në Kosovë, Bislim Bislimi, si dhe përfaqësues nga Ministria e Punëve të Jashtme e Hungarisë.

Gjatë vizitës delegacioni pati mundësinë të njoftohet me punën e institucionit, shërbimet për përdoruesit, proceset e digjitalizimit si dhe mënyrat e ruajtjes së koleksioneve bibliotekare.

Nënshkrimi i memorandumit shënon një hap të rëndësishëm drejt forcimit të bashkëpunimit mes dy bibliotekave dhe zhvillimit të lidhjeve kulturore mes Kosovës dhe Hungarisë.