Nico Paz po shndërrohet në një nga emrat më të kërkuar të futbollit evropian. Pas paraqitjes fantastike ndaj Manchester United, ku realizoi dy gola dhe dha një asistim, vlera e argjentinasit është rritur ndjeshëm.

Sipas “Tuttomercatoweb”, mesfushori ofensiv mund të vlejë nga 130 deri në 150 milionë euro në tregun aktual.

Edhe pse Transfermarkt e vlerëson ende me 80 milionë euro, paraqitjet e tij dhe shifrat e transferimeve të fundit në futbollin evropian tregojnë se çmimi mund të jetë shumë më i lartë.

Në Premier League, për shembull, Enzo Fernandez kushtoi 145 milionë euro, Morgan Rogers 138 milionë, ndërsa Elliot Anderson 135 milionë euro.

Nico Paz, një yll në ngritje

Në moshën 22-vjeçare, Paz është bërë një nga lojtarët kryesorë të Como-s dhe një emër i rëndësishëm për Argjentinën. Aftësia për të krijuar raste, për të kaluar kundërshtarët dhe për të prodhuar gola e asistime e bën atë një futbollist me vlerë të veçantë në treg.

Një çmim prej 150 milionë eurosh do të ishte më shumë shuma që Como mund të kërkonte për ta lënë të largohej, ndërsa një vlerësim prej 130 deri në 140 milionë eurosh do të ishte më afër shifrave të transferimeve të mëdha të fundit.

Real Madridi e ka një avantazh të madh

Pavarësisht rritjes së vlerës së tij, Real Madridi mund ta rikthejë lojtarin për një shumë dukshëm më të ulët. Klubi spanjoll ka ruajtur në marrëveshjen me Como-n një klauzolë riblerjeje prej 80 milionë eurosh, të vlefshme për verën e vitit 2027.

Kjo do të thotë se madrilenët mund ta rikthejnë talentin argjentinas për gati gjysmën e vlerës së mundshme të tij në treg.

Sa më shumë të shkëlqejë Nico Paz, aq më e vlefshme bëhet kjo mundësi për Real Madridin, i cili mund ta rikthejë në skuadër një nga talentet më premtues të futbollit evropian pa hyrë në një garë të kushtueshme me klubet e tjera.