Kryeministri i Shqipërisë, Edi Rama, ka deklaruar se nuk do të japë dorëheqje pas protestave që kanë përfshirë Tiranën javët e fundit, duke theksuar se ndryshimi i qeverisë në demokraci bëhet përmes zgjedhjeve dhe jo përmes dhunës.

Në një intervistë për gazetën greke “Kathimerini”, Rama ka thënë se qeveria e tij ka marrë një mandat të qartë nga qytetarët dhe se synon ta përmbushë atë.

“Populli shqiptar na dha një mandat të qartë vitin e kaluar dhe unë synoj ta përmbush atë. Çdokush mund të kërkojë dorëheqjen time; kjo është pjesë e jetës demokratike. Askush nuk ka të drejtë ta imponojë atë me dhunë. Detyra ime është të dëgjoj ankesat e arsyeshme, të mbroj të drejtat e qytetarëve dhe të vazhdoj punën për integrimin e Shqipërisë në Bashkimin Evropian”, ka deklaruar Rama.

Ai ka shtuar se nuk do të heqë dorë nga detyra e tij për shkak të atyre që, sipas tij, besojnë se dhuna është rruga më e shpejtë drejt pushtetit.

Në intervistë, kreu i qeverisë shqiptare i ka ndarë protestuesit në dy grupe: ata që kërkojnë një të ardhme më të mirë dhe ata që përfshihen në akte dhune. Rama ka pretenduar se disa prej këtyre të fundit kanë lidhje me lëvizjen Antifa.

“Ekziston një vijë e qartë ndarëse midis studentëve që duan një të ardhme më të mirë dhe grupeve të mbuluara me kapuçë, përfshirë njerëz që i kam lidhur me lëvizjen Antifa – të cilët hedhin kokteje molotov, sulmojnë ndërtesa publike dhe dëmtojnë pronën private”, ka thënë Rama.

Ai ka theksuar se lufta kundër korrupsionit është përgjegjësi e institucioneve të drejtësisë dhe jo e grupeve që përdorin dhunën për të pretenduar se përfaqësojnë një brez të tërë.

Buxheti i vitit 2027 do të përfshijë masa shtesë për studentët

Duke iu përgjigjur shqetësimeve të të rinjve për arsimin, koston e jetesës dhe mungesën e mundësive, Rama ka bërë të ditur se buxheti për vitin 2027 do të përfshijë masa shtesë për familjet, shërbimet publike dhe studentët.

“Buxheti i vitit 2027, të cilin do ta paraqesim së shpejti, përfshin masa shtesë për familjet, shërbimet publike dhe studentët. Në të njëjtën kohë, i kam ftuar studentët dhe mësuesit në një dialog të hapur. Jam i gatshëm të shqyrtoj çdo propozim serioz, madje edhe ato që vijnë nga kritikët tanë më të ashpër”, ka deklaruar kryeministri shqiptar.

Në fund të intervistës, Rama ka thënë se nuk ka pretenduar asnjëherë se gjithçka në Shqipëri është bërë mirë, ndërsa ka përsëritur qëndrimin e tij kundër përdorimit të dhunës për marrjen e pushtetit.

“Një pakicë beson se djegia e vendit është rruga më e shkurtër drejt pushtetit”, ka përfunduar Rama.