Ambasadori i ShBA-së në NATO, Matthew Whitaker, ka thënë të mërkurën se nuk pret ndryshime në politikën e jashtme të Uashingtonit pas zgjedhjeve të mesmandatit, në të cilat republikanët kanë humbur kontrollin e të dy dhomave të Kongresit.

“Politika e jashtme e Shteteve të Bashkuara nuk ka ndryshuar dhe nuk pres që ajo të ndryshojë pas zgjedhjeve të mesmandatit”, ka thënë Whitaker gjatë një paneli në Konferencën e Sigurisë në Berlin.

“Problemet me të cilat po përballemi si vend dhe si aleancë janë të njëjta”, ka shtuar ai.

“Ne kemi nevojë për një Evropë të fortë brenda një NATO-je të fortë dhe e kemi realizuar këtë projekt çdo vit që kur e kemi pranuar”, është shprehur Whitaker.

Duke folur për ndarjen e barrës së mbrojtjes, Whitaker ka pranuar se në të kaluarën ka pasur mosmarrëveshje ndërmjet aleatëve, por ka theksuar se administrata Trump mbetet e përkushtuar ndaj detyrimeve të saj sipas Traktatit të NATO-s.

“Padyshim, ne jemi nënshkrues të Traktatit të Uashingtonit dhe Neni 5 është një lloj marrëveshjeje për të cilën të gjithë kemi nënshkruar. Gjithashtu, të gjithë kemi nënshkruar tërë traktatin”, ka thënë ai.

Whitaker ka përsëritur se Uashingtoni u qëndron besnik angazhimeve të tij, ndërsa pret që aleatët evropianë t’i forcojnë aftësitë e tyre mbrojtëse.

Zgjedhjet e mesmandatit të së martës i kanë shkaktuar një pengesë presidentit Donald Trump dhe Partisë Republikane. Mediat kryesore amerikane kanë parashikuar se demokratët do ta rifitojnë kontrollin e Dhomës së Përfaqësuesve dhe të Senatit.