Vëllaznimi ka shënuar fitore shumë të rëndësishme në kuadër të Superligës së Kosovës në hendboll në konkurrencë të meshkujve.

Të mërkurën mbrëma në palestrën “Shani Nushi” në Gjakovë, Vëllaznimi e mposhti kampionin aktual, Kastriotin e Ferizajt me rezultatin 34:33.
Ndeshja derbi e xhiros së shtatë ishte ashtu si pritej – e fortë dhe dramatike. U vendos vetëm në aksionet e fundit.
Pas pjesës së parë rezultati ishte 14:14. Edhe pjesa e dytë ishte e fortë dhe kryesisht e barabartë. Fillimisht ferizajasit ishin në epërsi të lehtë, kurse vendasit barazonin. Më pas Vëllaznimi doli para. Vetëm në minutën e 55-të gjakovarët ia dolën të shkëputen në tri gola, 31:28, e më pas edhe në katër, 34:30. Kastrioti u afrua në 34:33, por pa barazuar.
Kështu fitorja e madhe i takoi Vëllaznimit.
Mali Luzha shkëlqeu te Vëllaznimi me tetë gola. Aloja tjetër, Granit Kadiri, ishte më efikasi me dhjetë gola. Gjashtë i realizoi Çlirim Rama.
Eray Karakoç i realizoi nëntë gola për Kastriotin, kurse tetë i kishte Alban Haziri.
Vëllaznimi me fitore doli në vendin e tretë me tetë pikë. Ka katër fitore e dy humbje. Kastrioti bie në vendin e katërt me gjashtë pikë. Ka tri fitore e tri humbje.