E uroi për ditëlindje, disa orë më vonë klubi anglez e shkarkoi nga puna trajnerin
Blackpool ka shkarkuar trajnerin Ian Evatt në ditëlindjen e tij të 45-të, pas vetëm një viti në drejtimin e skuadrës.
Vendimi i klubit anglez ka ardhur pas rezultateve të dobëta në javët e fundit, ku Blackpool ka regjistruar vetëm një fitore dhe gjashtë humbje në 10 ndeshjet e fundit në kampionat.
Ndeshja e fundit e Evattit në stol ka qenë humbja 1:0 në udhëtim ndaj AFC Wimbledonit, rival i drejtpërdrejtë në luftën për mbijetesë. Ky rezultat e ka lënë Blackpoolin vetëm një pozitë mbi zonën e rënies nga League One.
Megjithatë, trajneri kishte shpjeguar pas ndeshjes se skuadra ishte goditur rëndë nga një virus gjatë udhëtimit në Londër, duke bërë që disa futbollistë të mos ishin në gjendje të luanin.
Ajo që e bën edhe më të veçantë këtë shkarkim është fakti se vetëm disa orë më parë, klubi kishte publikuar një urim për ditëlindjen e trajnerit në rrjetet sociale.
Në njoftimin zyrtar, Blackpool e ka falënderuar Evattin për punën dhe angazhimin e tij, ndërsa ka bërë me dije se Steve Thompson do ta drejtojë ekipin në ndeshjen e së shtunës kundër Wigan Athletic.




