Balla poston video nga vizita e Jakup Krasniqit: Shqipëria dhe Kosova i duan në shtëpi komandantët e lirisë
Shefi i deputetëve socialistë në Parlamentin shqiptar, Taulant Balla, ka shpërndarë pamjet e sotme të ish-kryetarit të Kuvendit të Kosovës, Jakup Krasniqi, teksa përshëndeste nga distanca familjarët e tij në Prishtinë.
Në një reagim të tij në Facebook, Balla tha se shqiptarët i duan komandantët e lirës në shtëpi.
“Shqipëria dhe Kosova i duan në shtëpi komandantët e lirisë”, shkroi ai mbi videon e publikuar.
Krasniqi përfundon sot vizitën e tij katër-ditore, e cila iu mundësua nga Dhomat e Specializuara të Kosovës në Hagë për shkaqe humanitare.
Vizita e tij ka të bëjë me gjendjen shëndetësore të bashkëshortes së tij, Sevdijes.
Ish-zëdhënësi i UÇK-së nuk është lejuar të takojë askënd jashtë rrethit të ngushtë të familjes së tij. Madje as vëllain e tij, Dautin, i cili gjatë ditës së djeshme është parë teksa sorollatej rreth shtëpisë së vëllait të tij, duke mos u lejuar nga forcat e EULEX-it të afrohej te shtëpia e Jakupit.



