Gjatë 24 orëve të fundit, ushtria serbe po dhunon psiqikisht qytetarët e brezit kufitar. Fatkeqësisht edhe për shkak të rrethanave të krijuara por edhe nga neglizhenca, asnjë zyrtar shtetëror nuk ka qenë për t’i vizituar këta qytetarë të harruar.

I vetmi personalitet ushtarak e politik që i ka vizituar banorët e fshatrave: Karaqeve, Mohoc, Brenzic etj, ishte gjeneral Hisen Berisha.

Ai sot gjatë ditës ishte pranë tyre dhe mori informacione të drejtëpërdrejta nga banorët vendas mbi lëvizjet e policisë, xhandarmërisë dhe ushtrisë serbe, shqetësimet e qytetarëve dhe situatën e rëndë sociale dhe ekonomike atje.

Gjeneral Berisha ishte krah i tyre edhe gjatë luftës ku ishte pjesë komanduese në radhët e UÇPMB-së.

Ai u zotua se do të jetë zëri i tyre mbështetës në institucionet e Kosovës.

Postimi i plotë i gjeneral Berishës në rrjetin social ‘Facebook’, duke përshkruar edhe rrëfimet e banorëve të zonës kufitare:

Ashtu siç isha bashkë me Ju në radhet e UÇPMB, do jemi bashk edhe në sfidat e rrugës përpara.

– Nga të gjitha kodrat përrreth jemi nën vëzhgimin kërcënues të snajperëve të ushtrisë serbe (Karaçevë)

– Ne karaçevasit e fshatrat përrreth jetojmë në ankthin e depërtimit në vendbanimet tona, i xhandarmërisë serbe (Karaçevë).

– Ne po i vuajm sanksionet dhe kufizimet nga Serbia në njëren anë dhe ato kur hyjmë në Kosovë (Mohoc).

– Na kemi taksa tarifore kur furnizohemi me mallra elementare edhe nga Kosova edhe nga Serbia (Mohoc).

– Çdo ditë po zbrazen vendbanimet shqiptare të mbetura brenda Serbisë (Mohoc).

– Jeta këtu po rëndohet çdo ditë. Nuk ka furnizime me ushqime; nuk ka shërbime shëndetësore, arsimimi vetëm fillor është i dobët (Mohoc).

– Në Grykën e Ushit, mbi bazen e vjeter të ish APJ, po ndërtohet një bazë  ushtarake më e madhe se “Boundsteel”. Kjo përbën rrezik për Ne e rajonin. (Mohoc).

Kjo është gjendja e Luginës, që duhet të rëndoj mbi ndërgjegjen e politikbërjes në Prishtinë e Tiranë.