Mundësia që Gjykata Kushtetuese nëpërmjet një aktgjykimi të vendosë afate kohore për formimin e qeverisë po shihet si shkelje e Kushtetueses dhe jashtë kompetencave të kësaj gjykate.

Ekspertë të Kushtetutës thonë se Gjykata Kushtetuese nuk mund të krijojë norma të reja pasi hyn në kompetenca të Kuvendit të Kosovës.

Profesori universitar, një prej hartuesve të Kushtetutës, Riza Smaka, thotë se Gjykata Kushtetuese ekskluzivisht ka autorizim për të bërë interpretimin e dispozitave kushtetuese kontestuese dhe jo t’i tejkalojë kompetencat e veta.

“Gjykata Kushtetuese ekskluzivisht ka autorizim për ta bërë interpretimin e dispozitave kushtetuese kontestuese, asgjë tjetër, kurrsesi. Nën dy, nuk ka autorizim për të krijuar normë, për të caktuar afate. Ajo është ekskluzivë e legjislativit. Gjykata nuk do të duhej të lëshohej në atë sferë sepse do të rrëshqiste, t’i tejkalonte kompetencat e të ushtrojë kompetenca të legjislativit. Do ta shkelte Kushtetutën”, ka thënë Smaka për Kosovapress.

Mendim të njëjtë se Gjykata Kushtetuese nuk mund të vendosë afate kohore ka edhe njohësi i rrethanave kushtetuese, Mazllum Baraliu, i cili thotë se nëse merret një vendim i tillë, mund të jetë diskutabil.

“Gjykata nuk do të duhej të krijonte praktika siç kanë ndodhur më parë që ta rishkruajë Kushtetutën. Kushtetuta shkruhet vetëm nga kushtetutëbërësi, nga ai i cili e përpilon dhe miraton e që është Kuvendi i Kosovës. Gjykata Kushtetuese është vetë gardian i Kushtetutës, mbrojtëse e saj dhe interpretuese e saj. Këtë duhet të bëjë edhe tani. Diçka më tepër që tejshkohet, mendoj se mund të ketë probleme pastaj dhe vendimi i saj mund të jetë diskutabil për palët”, thotë ai.

Njohësi i kushtetutës, Riza Smaka, thotë se Gjykata Kushtetuese këtë lëndë është dashur të kryente brenda një jave. “Gjykata Kushtetuese këtë është dashur të kryente brenda javës. Kjo është çështje juridike e thjeshtë. Çdo jurist që mund të jetë edhe ordiner, që nuk pretendon të jetë ndonjë shkencëtar dhe ekspert, këtë çështje juridike do të kishte zgjidhur në mënyrë korrekte dhe pa asnjë dilemë brenda një jave mos të them, por brenda gjysmë ore. E lexon me kujdes, e analizon me kujdes, nëse dyshon i merr dy a tri kushtetuta të shteteve parlamentare, e bën një krahasim dhe del me konkluzion”, thotë ai.

Muajin e kaluar presidenti i Kosovës, Hashim Thaçi, ka dekretuar për kryeministër Avdullah Hotin e LDK-së. Ky dekret është kontestuar nga partia fituese e zgjedhjeve, Lëvizja Vetëvendosje në Gjykatën Kushtetuese. Kjo e fundit pritet që të premten e datës 29 maj të vendosë për kushtetutshmërinë e dekretit të Thaçit./kp