28 vjeçari Alejandro Porro peshonte 215 kg para nisjes së rrugëtimit të tij të vështirë, rënies në peshë. Por shoferi i kamionit tashmë duket tjetër njeri pas rënies prej më shumë se 100 kg.

Alejandro nga Florida në SHBA thotë se nisi të trembej se pesha e tij do ta vriste, prandaj ndaloi të gjitha ushqimet e shpejta. Duke mbajtur fjalën e tij ai nisi të stërvitej dhe nisi rrugëtimin e vështirë në mars të 2017-s.

Tashmë pa ndërhyrje kirurgjike ka kaluar nga masa XXXXXL në L dhe peshon vetëm 90 kg.

Alejandro thotë: “Gjithmonë kam qenë një fëmijë pak i shëndoshë, por kjo nisi të përkeqësohej. Jetoja në mënyrë shumë të pashëndetshme duke luajtur shumicën e kohës në kompjuter dhe duke ngrënë piza ose ushqime të tjera të shpejta. Nuk isha duke jetuar, vetëm duke ekzistuar”.

Ai thotë se mori vendimin e vështirë të hiqte dorë nga biskotat, patatinat e gurabijet, për t’i zëvendësuar me fruta dhe perime.

Përveç ndryshimit të dietës, Alejandro thotë se kreu të tjera ndryshime në rutinën e përditshme si, për shembull, duke zgjedhur të përdorte shkallët në vend të ashensorit. Më pas ai u regjistrua në palestër dhe humbi rreth 100 kg në një vit e gjysmë.

Kjo i shtoi atij besimin në vetvete dhe e inkurajoi të hynte në një konkurs të transformimeve trupore, ku çuditërisht doli në vend të parë.

Alejandro shton: “Nuk e mendoja kurrë se do të isha këtu ku jam sot. Humba peshën time në mënyrë natyrale, duke u stërvitur dhe duke matur ushqimet që haja. Tani jam krenar dhe i kënaqur me veten. Më kanë mbetur ca lëkura të tepërta si në zonën e barkut, por i konsideroj si trofe të arritjes time. Punoj ende me trupin për t’u përmirësuar”.