Këshilli i Bashkimit Evropian (BE) ia ka zgjatur mandatin shefes së Zyrës së BE-së në Kosovë, Nataliya Apostolova, deri më 29 shkurt 2020.

“Mandati i Nataliya Apostolovës si përfaqësuese speciale e Bashkimit Evropian është zgjatur për 20 muaj, deri më 29 shkurt 2020”, ka bërë me dije Bashkimi Evropian.

Apostolova është emëruar si përfaqësuese speciale më 4 gusht 2016, raporton Gazeta “Alo”.

Për 20 muaj janë vazhduar edhe mandatet e përfaqësuesve specialë të BE-së në Azinë Qendrore, Bririn e Afrikës, Sahelin, Kaukazin Jugor dhe krizën në Gjeorgji.

Mandati i përfaqësuesit të Bosnje dhe Hercegovinës i është vazhduar për 14 muaj.

Përfaqësuesit specialë promovojnë politikat dhe interesat e BE-së në rajone dhe shtete të caktuara, si dhe çështje me interes të veçantë për BE-në.

Ata luajnë një rol aktiv në konsolidimin e paqes, stabilitetit dhe sundimit të ligjit. Përfaqësuesit e parë të BE-së u emëruan në vitin 1996.

Aktualisht, tetë përfaqësues specialë mbështesin punën e përfaqësueses së lartë të Bashkimit Evropian për politikën e jashtme dhe të sigurisë, Federica Mogherini.

Këto janë gjashtë të lartpërmendura dhe përfaqësues të posaçëm për të Drejtat e Njeriut dhe procesin e paqes në Lindjen e Mesme.