Aleanca për Ardhmërinë e Kosovës (AAK) do të garojë si subjekt i vetëm në zgjedhjet e 28 dhjetorit, ka deklaruar zyrtari i lartë i kësaj partie, Daut Haradinaj.

Haradinaj në intervistën për “Kosovapress”, ka thënë se janë duke synuar rezultate të mira dhe se “nuk do të ketë krijim të institucioneve pa Aleancën dhe do të jetë një parti e konsoliduar parlamentare”.

Lista zgjedhore e kandidatëve për deputetëve, ka thënë ai se do përbëhet nga 110 figura të të gjitha fushave.

Haradinaj ka deklaruar se për zgjedhjet e parakohshme të dhjetorit janë duke hartuar një program real dhe se oferta e tyre është për ndryshim të gjendjes në vend.

“Ne do të bëjmë ma të mirën në këto zgjedhje, domethënë jemi kah shkojmë me një program real, jemi duke e hartuar listën garuese për deputetë me figura që i mendojmë më të mirat që i ka shoqëria në Kosovë, pa përjashtuar asnjë kategori të shoqërisë, duke filluar prej sportit, kulturës, letërsisë, shkencës e deri te njerëzit e kontributit për liri domethënë figurave të luftës, pse jo domethënë përfaqësimin e diasporës, mendoj që jemi kah e ofrojmë një listë të fortë, të mirë”, ka deklaruar Haradinaj.

Ai ka theksuar se janë të interesuar të bëjnë një fushatë programore me ofertë e jo të akuzojnë shumë.

“Qëllimi edhe në të kaluarën e afërt edhe sot është që të ndërrojmë gjendjen në Kosovë, me e kthyer Kosovën në binare të veta, drejtimin që ka qenë me i kthyer aleatët prapë. Raportet me ta që t’i kemi shumë më të mira, me i heq sanksionet kundër Kosovës, me e kthyer shtetin në binar për shkak se kemi dëme marramendëse”, ka thënë Haradinaj.

AAK-ja është duke shpresuar në rezultate e përqindje më të lartë në këto zgjedhje të jashtëzakonshme.

“Qëllimi jonë është që të ndërrojmë situatën, me ndërruar gjendjen dhe me ndërruar qeverisjen. Automatikisht kjo nënkupton një qeveri pa zotin Kurti edhe ndoshta e patëm mundësinë edhe me Glauk Konjufcën, por sidoqoftë, ishte situata çfarë ishte dhe mundësia e bashkëpunimit ishte e pamundur dhe unë mendoj që Aleanca do të ketë dyshifrorë, minimalisht domethënë dhe ta ketë një përqindje modeste, të mirë dhe të jetë një parti e konsolidum parlamentare dhe nuk mendoj që do të ketë krijim të institucioneve të Kosovës pa Aleancën”, ka thënë Haradinaj.

Ai ka konfirmuar se gjatë këtyre ditëve kanë zhvilluar takime pothuajse me të gjitha partitë politike, por që qëndrimi i tyre është garimi pa marrëveshje parazgjedhore.

Aleanca për Ardhmërinë e Kosovës (AAK) në zgjedhjet e 9 shkurtit ka garuar në koalicion me Nismën Socialdemokrate. Ky koalicion ka dalë në vendin e katërt me 7.06 për qind të votave ose tetë ulëse.

Fushata zgjedhore do të fillojë me datën 17 dhjetor, ndërsa periudha e aplikimit për regjistrim të votuesve jashtë Kosovës ka nisur me datën 26 nëntor dhe përfundon me 6 dhjetor.