Kryetari i LDK-së, Lumir Abdixhiku, i është drejtuar publikisht kryeministrit Albin Kurti, duke i kërkuar që të përcaktohet qartë nëse synon një marrëveshje politike me LDK-në apo kërkon një zgjidhje më të gjerë edhe me PDK-në.

Në një postim publik, Abdixhiku ka thënë se, nëse Kurti synon 90 vota dhe nuk mundet pa PDK-në, atëherë LDK nuk mund ta ndihmojë në këtë proces.

Ai theksoi se, pasi të arrihet një marrëveshje mes palëve të tjera, atëherë çështja mund të trajtohet.

“I nderuar Kryeministër Kurti, meqë po komunikojmë në distancë, ju lutem përcaktohuni a doni marrëveshje politike me LDK-në, apo i doni 90 vota edhe me PDK-në. Nëse është kjo e dyta dhe nuk mundeni pa ta, atëherë nuk mund t’ju ndihmojmë. Kur të merreni vesh, e trajtojmë. Por, nëse doni marrëveshje politike me LDK-në, atëherë flisni me ne. Presidentin e propozojmë ne me plot pergjegjësi. Mund ta propozojmë edhe Vjosa Osmanin, nëse na i garantoni 66 vota për të. Ju faleminderit!”, ka shkruar Abdixhiku në ‘Facebook’.