Trajneri i Real Madridit, Alvaro Arbeloa, ka qenë tepër lavdërues ndaj lojtarëve të tij para përballjes në Ligën e Kampionëve kundër Benficas, teksa synon fitoren e katërt në pesë ndeshjet e fundit. “Los Blancos” mund ta sigurojnë një vend në tetëshen e parë ndaj Benficas pavarësisht rezultatit, por do ta garantojnë atë me një fitore ose barazim.

Arbeloa është vlerësuar për përmirësimin e atmosferës në dhomat e zhveshjes dhe për një ekip shumë më të motivuar në aspektin defensiv, në kontrast me skuadrën që ishte parë nën drejtimin e Xabi Alonsos. Trajneri spanjoll u shpreh mirënjohës ndaj lojtarëve të tij.

“Unë mund të flas vetëm për 15 ditët që kam qenë këtu. Që nga momenti kur kam ardhur, kam parë një grup lojtarësh shumë të përkushtuar, të gatshëm të dëgjojnë dhe të punojnë fort. Ata po e zbatojnë në praktikë atë që kemi diskutuar. Dhe kjo është gjëja më e bukur. Ende kemi shumë hapësirë për përmirësim dhe, nëse duam të arrijmë gjithçka, duhet të jemi një ekip që bën shumë gjëra mirë. Kjo kërkon punë të madhe dhe stërvitje. Por deri më sot, ajo që po bëjnë lojtarët është vërtet për t’u vlerësuar, me një trajner të ri dhe në një kohë kaq të shkurtër”.

Arbeloa ishte po ashtu shumë elogjues për Jude Bellinghamin, kur u pyet nëse një nga objektivat e tij ishte ta rikthente mesfushorin anglez në formën më të mirë.

“Jude… dhe po e them këtu hapur… nuk është se ka qenë surprizë, por që nga dita e parë kam parë një lojtar me cilësi dhe talent të jashtëzakonshëm. Diçka që bëhet edhe më mbresëlënëse kur e sheh nga afër. Por përtej kësaj, kam parë një lider. Para dy ditësh, 48 orë pas një ndeshjeje, i thashë: ‘Zakonisht nuk e them këtë, por ndalo së vrapuari’. Performanca që po tregon në stërvitje, përkushtimi dhe lidershipi i tij… jam shumë krenar për nivelin e tij dhe që kam një lojtar si ai.”

“Në fushë, ai është i aftë të bëjë shumë gjëra: bën lëvizje pa top, lexon lojën dhe ka një goditje shumë të mirë. Është i ri, por ka një bagazh të madh përvoje. Dhe ai do të jetë shtylla kryesore e këtij Real Madridi për shumë, shumë vite me radhë”.