Bashkimi ka mundur Kosovahome Prishtinën me rezultat 81:66 (20:25, 24:11, 16:14, 21:16), në kuadër të javës së tretë të Superligës së Femrave.

Ndeshjen më mirë e nisi skuadra mysafire, duke fituar çerekun e parë me rezultat 20:25. Megjithatë, vashat prizrenase këndellen në periudhën e dytë, duke e fituar 24:11, për të shkuar në pushim me rezultat 44:36.

Lojë më e barabartë u zhvillua në periudhën e tretë, që përfundoi 16:14 për skuadrën vendase, derisa rezultati në semafor ishte 60:50 pas 30 minutash lojë. Duhet cekur se skuadra mysafire për shkak të mjngesave për 30 minuta luajti me 5-shen e parë dhe nuk bëri asnjë zëvendësim, që sigurisht se ndikoi në lojën e skuadrës prishtinase. Ndërrime nuk kishte as në 10 minutat e fundit, që përfundoi 21:16 dhe Bashkimi triumfoi me rezultat 81:66.

Te Bashkimi u dalluan Saranda Daci me 24 pikë e 11 kërcime, Lajzae Davidson me 16 pikë e 7 kërcime, Jeleesa Avery me 14 pikë e 8 kërcime dhe Arbnore Përquku me 8 pikë, 9 kërcime dhe 14 asistime, derisa te Kosovahome Prishtina u dalluan Era Shatri me 19 pikë e 8 kërcime dhe Enisa Kamerolli me 17 pikë.

Bashkimi ka tri fitore në po aq ndeshje të zhvilluara, kurse Kosovahome Prishtina një fitore dhe dy humbje.