BE-ja pajtohet për rregulla më të forta ndaj gazsjellësit rus

08 shkurt 17:36

Ambasadorët e Bashkimit Evropian janë pajtuar që t’i ashpërsojnë rregulloret mbi një gazsjellës të diskutueshëm nga Rusia në Gjermani, dhe kanë vendosur që të mos mbështesin plane që mund të kërcënojnë përfundimin e tij.

Puna në gazsjellësin “Rrjedha Nordike 2”, i gjatë 1 225 kilometra dhe që kalon nën Detin Baltik është në realizim e sipër dhe pritet të përfundojë në fund të vitit 2019.

BE-ja do që t’i fusë gazsjellësit që hyjnë në bllok nën rregullat e saj për energjinë.

Por, Gjermania ka pasur frikë se kjo do ta bënte gazsjellësin joekonomik dhe të paarritshëm.

Raportohet se 27 nga 28 ambasadorët e BE-së janë pajtuar me propozimin që Gjermania të mbetet negociatorja kryesore në projektin “Rrjedha Nordike 2”, raporton “Rel”.

Rusia aktualisht furnizon rreth 40 për qind të BE-së me gaz.

Me vite, BE-ja ka qenë e shqetësuar për mbështetjen në gazin rus.

Polonia ka paralajmëruar se Rusia mund ta përdorë “Rrjedhën Nordike 2” për të dëmtuar sigurinë e energjisë në Evropë, ndërsa presidenti i Shteteve të Bashkuara, Donald Trump, e ka cilësuar Gjermaninë si “rob” të Rusisë për shkak të gazit të saj.

Kancelarja gjermane, Angela Merkel, ka bërë përpjekje t’i sigurojë shtetet e Evropës qendrore dhe lindore se tubacioni nuk do ta bëjë Gjermaninë të mbështetet plotësisht te Rusia sa i përket energjisë.

“Gjermania do të zgjerojë rrjetin e terminaleve të gazit. Ne nuk duam të jemi të varur vetëm nga Rusia”, ka thënë Merkel të enjten.

Lajme të sponsorizuara

Të fundit
Izmi Zeka Edhe pse vitet ikin luftëtarët mbetën rruga e…