Kryetari i Komunës së Skenderajt, Bekim Jashari, ka takuar të premten drejtorët e shkollave në këtë komunë, me të cilët ka diskutuar për punën që po bëhet rreth përgatitjeve për fillim të vitit të ri shkollor 2018/2019. “U informova se drejtorët e shkollave në përgjithësi kanë përfunduar të gjitha përgatitjet, ndërkaq shkollat që janë në udhëheqje të tyre janë të gatshme për të pritur nxënësit, në kuadër të vitit të ri shkollor 2018/2019”, ka thënë Jashari.

Ai ka siguruar të gjithë drejtorët, pa përjashtim, se do ta kenë mbështetjen e tij, edhe jashtë orarit zyrtar të punës, madje edhe në ditë pushimi, në funksion të rritjes së cilësisë në arsim. “Iu kërkova gjithashtu që të shtojnë angazhimin në procesin e mësimdhënies, si dhe pastërti në ambientet shkollore”, ka thënë Bekim Jashari, kryetar i Komunës së Skenderajt.