Një gazetar italian raportohet se është pushuar nga puna pasi e ka pyetur një zëdhënës të Komisionit Evropian nëse Izraeli duhet të paguajë për rindërtimin e Gazës, raportoi të martën portali i lajmeve The Intercept.

Gabriele Nunziati, një korrespondent me bazë në Bruksel për agjencinë e lajmeve Nova të Romës, tha se ishte informuar se kontrata e tij do të ndërpritej rreth një muaj pasi ai filloi të mbulonte BE-në.

Vendimi erdhi menjëherë pasi një pyetje që ai bëri gjatë një konference për shtyp më 13 tetor u bë virale në internet.

Nunziati e pyeti Paula Pinhon, zëdhënësen kryesore të Komisionit Evropian, pse Izraeli nuk duhet të mbajë përgjegjësinë financiare për rindërtimin e Gazës, duke vënë në dukje se BE-ja ka thënë vazhdimisht se Rusia duhet të paguajë për rindërtimin e Ukrainës.

“Ju keni përsëritur disa herë se Rusia duhet të paguajë për rindërtimin e Ukrainës. A besoni se Izraeli duhet të paguajë për rindërtimin e Gazës pasi ata kanë shkatërruar pothuajse të gjithë infrastrukturën e saj civile?” pyeti Nunziati.

Pinho u përgjigj se ishte “një pyetje interesante”, por nuk pranoi të komentonte.

Dy javë më vonë, më 27 tetor, ai mori një email nga Nova ku thuhej se agjencia kishte ndërmend të ndërpriste bashkëpunimin e tyre, tha Nunziati për The Intercept.

Francesco Civita, një zëdhënës i Nova, konfirmoi ndërprerjen, duke thënë se pyetja ishte “teknikisht e pasaktë” sepse “Rusia pushtoi një vend sovran pa provokim, ndërsa Izraeli po i përgjigjej një sulmi”.

Civita argumentoi se Nunziati “nuk arriti të kuptonte ndryshimin thelbësor dhe formal në situata” dhe se videoja virale e pyetjes së tij shkaktoi “turp” për agjencinë pasi u nda nga kanalet mediatike “ruse dhe anti-evropiane”.