Presidenti i Shteteve të Bashkuara të Amerikës, Joe Biden, nëpërmjet një deklarate ka konfirmuar vrasjen e njërit prej liderëve kryesorë të grupit militant Shteti Islamik në Siri.

Në deklaratën e presidentit amerikan, konfirmohet se trupat amerikane kanë vrarë në Siri liderin e IS-it, Abu Ibrahim al-Hashimi al-Qurayshi.

“Falë aftësive dhe trimërisë së forcave tona të armatosura, ne kemi hequr nga fushëbeteja Abu Ibrahim al-Hashimi al-Qurayshi – liderin e ISIS. Të gjithë amerikanët janë kthyer shëndosh e mirë nga operacioni”, është thënë në deklaratën e lëshuar për media nga zyra e presidentit Biden.

Bideni ka bërë me dije se operacioni është kryer nën drejtimin e tij dhe se është zhvilluar në veriperëndim të Sirisë.

Sipas presidentit amerikan, Biden, trupat amerikane kryen një operacion kundër terrorizmit me qëllim që bota të jetë një vend më i sigurt.

“AP” ka raportuar se operacioni pasoi një seri sulmesh në rajon, duke përfshirë një sulm që zgjati gati dhjetë ditë me qëllim të marrjes nën kontroll të një burgu nga grupi militant IS, i cili po përpiqet të ringjallet.

Forcat speciale amerikane zbarkuan me helikopterë dhe sulmuan një shtëpi në një cep të kontrolluar nga rebelët në Siri, duke u përleshur për dy orë me persona të armatosur, thanë dëshmitarët, raporton “AP”.

Vendi ku është vrarë lideri i IS-it, është kryesisht i banuar nga njerëz që janë larguar kohë më parë nga luftimet që ndodhën në Siri.

Pas vrasjes së Abu Bakr al-Baghdadi më 27 tetor, 2019, grupi militant IS e kishte shpallur për lider të ri Abu Ibrahim al-Hashimi al-Qurayshin.

Më 19 dhjetor, 2018, asokohe presidenti amerikan, Donald Trump, kishte shpallur fitoren mbi grupin militant Shteti Islamik. Por, grupe të IS-it kishin vazhduar të kontrollonin disa territore brenda Sirisë.

Më 23 mars, 2019, zyrtarisht IS-i humbi kontrollin mbi territorin e fundit që kishte nën kontroll në Baghouz.

Një numër i madh i pjesëtarëve të IS-it  janë arrestuar dhe ende vazhdojnë të mbahen nëpër burgje të ndryshme në Siri.