Gentrit Kadrolli, kandidat i Doktoratës – Marketing

Sot një pjesë e konsiderueshme e klientëve ndiejnë keqardhje e neveri për një pjesë të bizneseve të cilat “i rritën vetë”. Kjo ndjesi sigurisht shfaqet pas disa tolerimeve me vetëdije të klientëve por që me shpresë gabimet do të mënjanoheshin e bizneset do të këndelleshin, tolerime këto të cilat bëhen nga ana e klientëve sepse nuk arrijnë të dalin nga kokat e tyre e të përballen me realitetin se ato biznese të cilat “i rritën vetë” kanë filluar në masë të humbin ndjesinë për bazën e tyre, me ata të cilët besuan në atë ofertë të vlerës që në fillim.
Njëra ndër problemet madhore por jo vetëm në raportin biznes-klient ka të bëjë me paaftësinë për të krijuar vlerë të qëndrueshme afatgjatë me klientët, kurse aftësi të shkëlqyer për të krijuar vlerë afatshkurtër e të rrejshme. Dëmi vazhdon dhe bëhet edhe më i thellë kur krijimi i vlerës afatshkurtër e të rrejshëm bëhet edhe tek baza e klientëve më me vlerë e që njihen si blerësit e hershëm, blerës këta që më pastaj do e kryejnë punën më të madhe – atë të rekomandimit te të tjerët. Do të thotë, duke tentuar për të krijuar vlerë afatshkurtër me vetëdije apo pa të, janë vetë ato biznese që do të rikthehen në pikën zero pikërisht nga ata të cilët iu besuan në fillim dhe i rritën gjithashtu. Kjo ndodh më shumë shpesh se sa rrallë për një varg arsyesh. Si të krijohet vlerë e qëndrueshme afatgjatë me klientët kur biznesi fillimisht hyn me ofertë komplete por që pas blerjeve të muajve të parë përvoja e klientëve nuk do jetë asnjëherë e njëjta sepse klientit i ofrohet produkti me madhësi më të vogël, me mungesë të përbërësve apo elementeve që ishin të përfshira më parë dhe me shërbim më të plogësht kurse çmimi mbetet i njëjtë e që ndodh edhe të ketë edhe rritje. Si të krijohet vlerë e qëndrueshme afatgjatë me klientët kur biznesi shërben ende me të njëjtin çmim atë që është ulur dhe atë që rri në këmbë. Si të krijohet vlerë e qëndrueshme afatgjatë me klientët kur problem i biznesit është problem gjeneral kurse ndonjë lëshim që ka mundur të shkaktohet nga klientët nuk ka aspak mëshirë. Si të krijohet vlerë e qëndrueshme afatgjatë me klientët kur bizneset krijojnë kartela të besnikërisë klientë por që janë pikë që duhen grumbulluara pothuajse pak të arritshme përderisa nuk krijohet fitim i shumëfishuar për kompaninë. Si të krijohet vlerë e qëndrueshme afatgjatë me klientët kur garancionet që ofrohen nga një pjesë e bizneseve nuk e krijojnë aspak ndjenjën e rehatisë e lëre më të sigurisë për klientët, por ofrojnë vetëm konflikte e kokëdhimbje. Si të krijohet vlerë e qëndrueshme afatgjatë me klientët kur menaxherët e shitjes janë për komunikim me klientët deri në nënshkrim kontrate kurse pas nënshkrimit thuhet që menaxherët janë për stafin dhe jo për juve klient “të dashur”.
Mundësi tjetër për të rritur e përforcuar prezencën e shumë bizneseve por që u bë “shuplakë” për klientët ishte edhe Black Friday ku ofertat më të sinqerta edhe pse larg konceptit të Black Friday ishin ndër tjera edhe të tilla si: 20% zbritje mbi blerjet 30 euro ose 15% zbritje mbi blerjet 20 euro e të ngjashme që veç oferta të Black Friday nuk mund të quhen. Sidoqoftë, më mirë të sinqertë se sa t’i duan rrejshëm klientët. Sot mjafton të shndërrohesh në blerës misterioz disa ditë para ditës së premte e të fundit të muajit nëntor dhe e kupton lehtë e qartë farsën që disa biznese ua bëjnë klientëve me çmime, sasi e cilësi, ua bëjnë atyre nga të cilët rriten vazhdimisht, atyre nga të cilët falen vazhdimisht për gabimet që bëjnë, atyre nga të cilët sot ende janë në treg.
Kur në shumicën e vendeve në botë kjo ditë përdoret për të lidhur më shumë klientët njëri me tjetrin me qëllim të krijimit të komuniteteve dhe të përforcimit të prezencës së markës së tyre në treg, tek ne ndodh e kundërta gjë dhe nëse nuk ka reflektim nga ana e shumë bizneseve ky “Fake Friday” vetëm se do t’ua dëmtoj vit pas vit elementin kryesor, e më të vlefshmin – atë të besnikërisë konsumatore.