Cakaj ka një thirrje publike për shqiptarët e Luginës së Preshevës

29 qershor 2020 | 14:40

Ministri në detyrë për Evropën dhe Punët e Jashtme të Shqipërisë, Gent Cakaj, u ka bërë thirrje qytetarëve të Bujanocit për dalje masive në zgjedhje, më 1 korrik, në qendrat ku do të ketë përsëritje të zgjedhjeve në këtë komunë.

Në profilin e tij në “Facebook”, ai ka shkruar se mbështetja e fortë për listën e Luginës së Bashkuar është thelbësore jo vetëm për mandatin e tretë të shqiptarëve në parlamentin serb por edhe për ta ruajtur frymën shqiptare në Bujanoc.

Postimi i Cakajt:

Një thirrje publike dhe një lajm i mirë për shqiptarët në Luginë

Më 1 korrik në qendrat ku do të ketë përsëritje të zgjedhjeve në Bujanoc, duhet të kemi një dalje masive në zgjedhje dhe një mbështetje të fortë për listën e Luginës së Bashkuar. Kjo është thelbësore jo vetëm për mandatin e tretë, por edhe për ta ruajtur frymën shqiptare në Bujanoc. Ndaj, pasi Kosova e Shqipëria kanë qëndruar me një zë e një frymë në mbështetje të kësaj liste, ju lutem mbështeteni deri në fund këtë ndërmarrje të përbashkët në të mirë të shqiptarëve!

Për më shumë, pas vizitës së fundit në Luginë, Qeveria e Shqipërisë ka dhënë edhe mbështetjen e nevojshme për Këshillin Kombëtar Shqiptar për përmbylljen e procedurave tarifore të teksteve të nevojshme shkollore sipas përcaktimeve të legjislacionit atje.

Kjo mbështetje shtesë vjen pasi janë aprovuar 24 tituj tekstesh shkollore të reja, të cilat do të jenë në shërbim të arsimit në gjuhën shqipe në Luginën e Preshevës.

Natyrisht, marrë parasysh gjendjen e rëndë të shqiptarëve në Luginë, duhet theksuar se mbetet ende shumë, shumë, shumë për t’u bërë.

Mirëpo, kjo nuk e ndryshon aspak faktin që veçanërisht Ministrja e Arsimit, Besa Shahini, ka bërë një punë të shkëlqyer për forcimin e mësimit shqip në Luginën e Preshevës. Ne do të vazhdojmë me qasje të bashkërenduar e vëmendje të shtuar për çështjet e shqiptarëve në Luginë.

Shihemi shumë shpejt me masa konkrete institucionale, natyrisht ???!

(M.K / Epoka e re)

Lajme të sponsorizuara

Të fundit
Kuvendi i Kosovës i ka bërë kërkesë Institutit Kombëtar të…