Nënkryetarja e PDK-së, Vlora Çitaku, i ka reaguar presidentes së vendit, Vjosa Osmanit për një deklaratë të saj gjatë ditës së sotme.

Të hënën e 28 gushtit, Presidenti i Francës, Emmanuel Macron në fjalimin e tij para ambasadorëve francezë nëpër botë foli edhe për dialogun Kosovë-Serbi. Ai ka paralajmëruar masa ndaj Kosovës e Serbisë nëse ato “nuk sillen me përgjegjësi”, shkruan gazeta online Reporteri.net.

“Franca e Gjermania kanë bërë zotime sa i përket politikave të vizave dhe çështje tjera ekonomike, të cilat do të rishikohen nëse palët dështojnë të sillen me përgjegjësi”, shtoi Macron.

E, Presidentja Osmani i është përgjigjur presidentit Macron duke thënë se “nëse pezullohet procesi i liberalizimit të vizave kjo e vret dialogun”.

Mirëpo Çitaku, ndërmjet një postimi në Facebook, ka shkruar se është interes shtetëror i Kosovës përmbyllja e suksesshme e dialogut me Serbinë.

Postimi i plotë:

Interes shtetëror i Kosovës është përmbyllja e sukseshme e dialogut me Serbinë, me një marrëveshje gjithëpërfshirëse, të përqëndruar në njohjen reciproke.

Interes shtetëror i Kosovës është kultivimi i aleancave me SHBA dhe BE.

Çdo gjë tjetër është rrugë pa krye.

Status quo i shërben vetëm Serbisë dhe forcave tjera rrënuese që po synojnë ta devijojnë orientimin strategjik të Kosovës dhe Ballkanit në përgjithësi.