Deputetët në takim me gjermanët: Kosova, e orientuar drejt perëndimit

14 qershor 2019 | 17:14

Anëtarët e Komisionit për Integrime Evropiane dhe të atij për Punë të Jashtme, kanë pritur në takim një delegacion të Grupit të Miqësisë për marrëdhënie me shtetet e Evropës jug-lindore të Bundestagut gjerman.

Zëvendëskryetari i Komisionit për Integrime Evropiane, Armend Zemaj, pasi u ka uruar mirëseardhje delegacionit gjerman, ka prezantuar punën e Komisionit për Integrime Evropiane në raport me sfidat dhe të arriturat e Kosovës në fushën e integrimeve evropiane.

Ai ka theksuar se për të shënuar progres në këtë drejtim është më se i nevojshëm bashkëpunimi ndërmjet Bundestagut gjerman dhe Kuvendit të Republikës së Kosovës.

“Ne si shtet synojmë familjen evropiane”, ka thënë Zemaj.

Ndërsa, në emër të Komisionit për Punë të Jashtme, fjalën e ka marrë deputeti Elmi Reçica, i cili ka theksuar se Kosova duhet të jetë pjesë e sigurisë globale, duke parandaluar dukuritë negative dhe duke siguruar mbështetje të vazhdueshme nga shteti i Gjermanisë.

Po ashtu, Reçica ka folur edhe për procesin e përmbylljes së dialogut në mes të Kosovës dhe Serbisë, duke thënë se vendi ynë është i interesuar për stabilizimin e marrëdhënieve midis dy shteteve.

“Ne jemi të orientuar drejt perëndimit, jemi pro Brukselit dhe pro anëtarësimit në NATO”, ka thënë Reçica.

Në anën tjetër, përfaqësuesi i Grupit të Miqësisë për marrëdhënie me shtetet e Evropës jug-lindore të Bundestagut gjerman, Josip Juratovic, ka thënë se misioni i tyre është që të promovojnë dhe të forcojnë ndërgjegjen parlamentare, duke u thirrur në arritjen e kompromisit midis shteteve.

“Kompromisi është zgjedhja e vetme për të arritur tutje”, ka thënë Juratovici, duke shprehur gatishmërinë për vazhdimin e bashkëpunimit ndërmjet Kuvendit të Kosovës dhe Bundestagut gjerman.

/Epoka e re/

Lajme të sponsorizuara

Të fundit
Ministria e Infrastrukturës dhe Transportit me anë të një videoje…