Dhjetë persona kanë vdekur nga stuhitë e borës në Ukrainë, tha ministri i Brendshëm i Ukrainës, Ihor Klymenko. Erërat e fuqishme dhe stuhitë kanë goditur Ukrainën që nga dita e djelë, duke shkaktuar ndërprerje të energjisë elektrike dhe duke bllokuar rrugët.

Pjesa jugore e Ukrainës është goditur më së shumti, sidomos rajoni i Odesës në Detin e Zi.

“Si pasojë e përkeqësimit të kushteve të motit, dhjetë persona kanë vdekur në rajonin e Odesës, Harkivit, Mikolajivit dhe Kievit”, shkroi Klymenko në Telegram.

“23 persona janë lënduar, përfshirë dy fëmijë”, shtoi ai.

Në total, 411 vendbanime në 11 rajone ukrainase kanë mbetur pa energji elektrike dhe mbi 1.500 makina ishin të bllokuara.

Oleh Kiper, guvernator i rajonit të Odesës, ku pesë persona kanë vdekur si pasojë e motit të keq, tha se pothuajse 2.500 persona janë shpëtuar pasi ishin bllokuar nga bora.