Ky nuk është udhëtimi në Kinë që presidenti amerikan Donald Trump kishte imagjinuar dhe ka pyetje të mëdha nëse ai mund të arrijë atë që dëshiron ndërsa ShBA mbetet e përfshirë në konflikt me Iranin, shkruan “CNN”.

Duke mos dashur që Irani të dominonte vizitën e tij, Trumpi e ka shtyrë udhëtimin e planifikuar në Kinë në mars për t’i dhënë kohë luftës, për të cilën ai ka thënë se do të zgjidhej brenda pak javësh, të zhvillohej. Muaj më vonë, një marrëveshje paqeje mbetet ende e paarritshme, dhe Trumpi ka thënë se armëpushimi me Iranin është në “mbështetje masive jetese”.

I pyetur pse Trumpi po vazhdon me këtë udhëtim, një zyrtar i lartë amerikan ka thënë: “Pse të mos vazhdojë me të gjitha detyrat e tjera që ka si president i ShBA-së?”.

Ai ka vënë në dukje se konflikti ishte më “aktiv” kur udhëtimi ishte shtyrë fillimisht.

Ndërsa liderët pritet të prezantojnë marrëveshje tregtare që Trumpi mund t’i paraqesë si fitore në vend, Irani ka të ngjarë të dominojë bisedimet. ShBA-ja vazhdon bllokadën në ngushticën e Hormuzit, gjë që ka pasoja të mëdha për Kinën, konsumatorin më të madh të naftës iraniane. Takimi i liderëve vjen vetëm disa ditë pasi ministri i Jashtëm iranian, Abbas Araghchi ka udhëtuar drejt Pekinit, duke nënvizuar lidhjet e ngushta mes dy vendeve.

Trumpi pritet të inkurajojë Xi Jinping që të ushtrojë presion ndaj Iranit për të rihapur ngushticën dhe për të pranuar një marrëveshje paqeje.

“Do të prisja që presidenti të ushtrojë presion”, ka thënë zyrtari amerikan, duke iu referuar një njoftimi të fundit për sanksione që synojnë individë dhe kompani që ndihmojnë përpjekjet e Iranit për të siguruar armë dhe materiale të tjera të papërpunuara.

Disa zyrtarë amerikanë kanë shprehur shqetësimin se Trumpi po hyn në një takim ku Xi ka avantazhin dhe se lideri kinez mund ta përdorë këtë ndikim për të marrë atë që dëshiron në një çështje të rëndësishme për Pekinin: Tajvanin.

“Ai do ta përmendë Tajvanin, mendoj, më shumë sesa unë”, u ka thënë Trumpi gazetarëve të hënën.