Sipas një raporti të publikuar nga Wall Street Journal, Emiratet e Bashkuara Arabe kanë kryer sulme ushtarake ndaj Iranit, pa i bërë publike këto veprime, duke u përfshirë në mënyrë të drejtpërdrejtë në një konflikt rajonal në rritje.

Sipas burimeve të cituara nga gazeta amerikane, sulmet kanë përfshirë edhe një goditje ndaj një rafinerie në ishullin iranian Lavan në Gjirin Persik, e cila dyshohet se është zhvilluar në fillim të prillit.

Ky sulm, sipas raportit, ka shkaktuar zjarr të madh dhe ka dëmtuar ndjeshëm kapacitetin e rafinerisë për muaj të tërë.

Autoritetet iraniane kishin deklaruar më herët se objekti ishte goditur nga një “sulm armik” dhe si kundërpërgjigje kishin lëshuar sulme me raketa dhe dronë drejt Emirateve të Bashkuara Arabe dhe Kuvajtit.

Raporti thekson se Irani ka shënjestruar Emiratet me mbi 2,800 dronë dhe raketa, më shumë se çdo vend tjetër në rajon.

Analistët e cituar nga Wall Street Journal e kanë cilësuar këtë zhvillim si domethënës, duke theksuar se përfshirja e një shteti arab të Gjirit si palë aktive në sulme ndaj Iranit mund të ndryshojë ekuilibrat diplomatikë dhe të rrisë tensionet në rajon.

Sipas tyre, kjo situatë mund të ndikojë edhe në përpjekjet për ndërmjetësim mes vendeve të Gjirit dhe Iranit.