FC Kosova po përjeton momentin më të mirë të sezonit! Pas një fillimi jo të lehtë në kampionat, skuadra jonë ka regjistruar fitoren e katërt radhazi në javën e dhjetë të kampionatit – dhe të gjashtën brenda muajit të fundit – kësaj here me një rezultat bindës 4-0 ndaj kundërshtarit të fortë, ASV Süshteln.

Në një ndeshje të dominuar nga fillimi në fund, djemtë e FC Kosovës treguan grintë, disiplinë dhe dëshirë të jashtëzakonshme për fitore. Motivimi ishte i madh: dy përballjet e kaluara ndaj këtij ekipi kishin përfunduar me humbje, ndaj “hakmarrja” më e mirë erdhi përmes një performance perfekte në fushë.

Zendeli & Kolici – heronjtë e mbrëmjes

Që në minutat e para u kuptua se skuadra ishte e karikuar maksimalisht emocionalisht për këtë takim. Vetëm në minutën e 11-të, sulmuesi ynë i papërmbajtshëm Egzon Zendeli hapi serinë e golave me një aksion personal të mrekullueshëm: driblim elegant, goditje precize dhe shpërthim emocionesh në tribuna.
Në vijim të pjesës së parë, pas një momenti pasigurie në mbrojtje, gjyqtari akordoi një penallti për miqtë – por portieri ynë Enea Kolici tregoi pse është ndër më të mirët e kampionatit, duke e pritur gjuajtjen me mjeshtëri të madhe dhe duke ruajtur epërsinë.
Në minutën e 40-të, kapiteni Astrit Hyseni shtoi avantazhin me një goditje të fuqishme nga brenda zonës, duke çuar FC Kosovën në pushim me rezultatin e sigurt 2-0.

Shfaqja e Egzonit – “hat-trick” dhe spektakël

Në pjesën e dytë, ASV Süshteln u përpoq të reagojë, por çdo tentativë u ndal nga Kolici në portë dhe nga një mbrojtje solide e organizuar në mënyrë perfekte.
Ndërkohë, njeriu i ndeshjes, Egzon Zendeli, shpërtheu edhe një herë: brenda vetëm gjashtë minutash, ai realizoi dy gola të tjerë, në minutat 55 dhe 61, duke kompletuar “hat-trick”-un personal dhe duke vulosur fitoren e madhe 4-0 për FC Kosovën.
Në minutat e mbetura, ndeshja u kthye në një festë për skuadrën dhe tifozët, që nga java në javë po shtohen gjithnjë e më shumë në shkallët e stadiumit.

Rritje e jashtëzakonshme dhe objektiva të larta

Kjo fitore e katërt radhazi ngjit FC Kosovën në vendin e dytë të tabelës me 21 pikë, vetëm dy pikë larg kryesuesve të Solingen 03, që kanë 23. Forma e jashtëzakonshme e ekipit, shpirtin luftarak dhe uniteti në skuadër po e kthejnë FC Kosovën në njërën nga pretendentet kryesore të kampionatit.
Ndeshja e radhës do të luhet të premten, më 24 tetor, në orën 20:00, kundër SSV Bergisch Born, në një tjetër duel të rëndësishëm për të vazhduar serinë fituese.
Në fund të ndeshjes ishte rezervuar një surprizë e këndshmr për presidentin e klubit z. Bujar Neziri, me rastin e ditëlindjes. Kjo fitore e bukur ishte dhurata më e mirë për të.
Forca FC Kosova – krenaria jonë po shkëlqen!