Niveli i materialit gjenetik të koronavirusit, i zbuluar në hundët e fëmijëve nën pesë vjeç, është 10 deri 100 herë më i lartë se ai që gjendet te fëmijët më të rritur dhe të rriturit, sipas një studimi amerikan.

“Fëmijët e vegjël mund të jenë transmetuesit kryesorë të virusit në popullatë”, sipas këtij studimi të botuar në revistën mjekësore “JAMA Pediatrics”, një hipotezë që po shkon kundër ligjërimit aktual.

Administrata e Donald Trumpit po nxit që prej disa javësh shkollat dhe kopshtet në shtete të ndryshme për t’u rihapur me qëllim për ta ringjallur ekonominë e vendit.

Mes 23 marsit dhe 27 prillit studiuesit kryen në Çikago teste depistimi me analizën nazale te 145 pacientë, që vuanin nga forma të lehta të sëmundjes Covid-19, një javë pas shfaqjes së simptomave të para. Pacientët u ndanë në tri grupe: 46 fëmijë nën pesë vjeç, 51 fëmijë të moshës 5 deri në 17 vjeç dhe 48 të rritur midis 18 dhe 65 vjeç.

Ekipi pa praninë e SARS-CoV-2 në sasi 10 deri në 100 herë më të lartë sesa të tjerët në rrugët e frymëmarrjes së fëmijëve të vegjël.

Autorët e studimit theksuan se një studim në laborator kishte treguar se sa më shumë material gjenetik të kishte virusi, aq më ngjitës mund të bëhej. “Si pasojë, fëmijët e vegjël potencialisht mund të jenë një faktor i rëndësishëm i përhapjes së SARS-CoV-2 në popullsi”, sipas shkencëtarëve.

“Sjelljet e zakonshme të fëmijëve të vegjël dhe hapësirat e mbyllura në shkolla dhe kopshte shtojnë pikëpyetjet për një përhapjeje të SARS-CoV-2 në këtë popullsi pasi masat shëndetësore të lehtësohen”, nënvizojnë ata.

Këto rezultate nuk i mbështesin autoritetet shëndetësore të cilët besojnë se fëmijët e vegjël nuk e transmetojnë shumë virusin, veçanërisht pasi është vërtetuar se ata kanë më pak të ngjarë të preken nga një formë e rëndë të sëmundjes. Sipas një studimi në Korenë e Jugut, fëmijët 10-19 vjeç e transmetojnë virusin po aq sa të rriturit në një familje, por fëmijët më pak se nëntë vjeç e transmetojnë më pak.