Federata e Futbollit e Kosovës dhe ekipi përfaqësues kanë ndarë 35 mijë euro për Fondin e Sigurisë, që javë më parë është hapur nga Qeveria e Republikës së Kosovës.

Në këtë shifër të ndarë për ushtrinë e vendit, me 50 përqind të mjeteve ka kontribuar FFK-ja dhe anëtarët e KE-së, derisa 50 përqind janë grumbulluar nga mjetet vetanake të futbollistëve.

“Ne si FFK konsiderojmë se kjo është vetëm një shifër simbolike, por mjaft domethënëse për forcimin e ushtrisë së vendit tonë dhe njëherësh është në interes të sigurisë dhe të ardhmes së qytetarëve tanë. Falënderoj lojtarët e ekipit përfaqësues për gatishmërinë e tyre për të përkrahur në vazhdimësi iniciativa të tilla dhe ky veprim i tyre le të shërbejë si motiv edhe për shumë të tjerë për ta mbështetur në të gjitha format forcimin e shtetit tonë”, ka thënë Agim Ademi, kryetar i FFK-së.