Franca e bën të detyrueshme vendosjen e maskave në shkolla dhe transport publik

28 prill 21:18

Franca do të bëjë të detyrueshme vendosjen e maskave në transportin publik dhe shkollat e mesme kur të fillojë lehtësimi i masave të izolimit më 11 maj, ka thënë kryeministri i këtij shteti, Edouard Philippe.

Shkollat do të rihapen gradualisht, duke nisur nga kopshtet për fëmijë dhe shkollat fillore.

Shkollat e mesme, në rajonet ku virusi nuk është përhapur shumë, mund të rihapen nga 18 maji, derisa nivelet tjera në fund të po atij muaji.

Dyqanet është thënë se do të rihapen më 11 maj, por jo edhe baret dhe restorantet.

Pronarët e dyqaneve do të kenë të drejtë t’iu kërkojnë blerësve që të vendosin maska, dhe duhet të sigurohen për mbajtje të distancës fizike.

Lehtësim për shumëkë ka qenë vendimi që francezët do të mund të dalin jashtë pa ndonjë certifikatë që tregon qëllimet e daljes së tyre, si dhe do të lejohet grumbullimi i më shumë se 10 personave.

Franca është një prej vendeve të prekura më së keqi në Evropë nga sëmundja Covid-19, që shkakton koronavirusi, bashkë me Mbretërinë e Bashkuar, Italinë dhe Spanjën.

Numri i personave që kanë vdekur nga virusi të martën është rritur për 367, duke e çuar numrin total të viktimave në 23,660, ndërkohë që janë infektuar rreth 129,859, transmeton “Rel”.

Spitalet kanë njoftuar së fundmi se është duke rënë numri i pacientëve që gjenden në kujdes intensiv, çka ka lënë hapësirë për shpresë.

Në një adresim para parlamentit, Philippe ka thënë se izolimi ka ruajtur rreth 62,000 jetë njerëzish në Francë brenda një muaji, mirëpo ka ardhur koha e lehtësimit të masave të izolimit për të shmangur shkatërrimin ekonomik.

Lajme të sponsorizuara

Të fundit
Kryeministri në detyrë, Albin Kurti, ka thënë se falë masave…