Zëvendëspresidenti i Galatasarayt, Metin Ozturk, ka konfirmuar zyrtarisht se klubi turk ka dorëzuar ofertën e nevojshme për të transferuar sulmuesin nigerian Victor Osimhen nga Napoli.

Në një deklaratë për mediat lokale gjatë mbledhjes së Federatës Turke të Futbollit, Ozturk theksoi se çështja do të zgjidhet brenda 48 orëve.

“Kemi bërë ofertën e duhur për Osimhen. Çështja do të marrë përgjigje shumë shpejt,” u shpreh ai, duke shtuar: “Ne do të ecim përpara në Champions League hap pas hapi. Fillimisht duam të arrijmë çerekfinalet, pastaj gjysmëfinalet dhe finalen. Çdo lojtar dëshiron të luajë për Galatasaray, përfshirë edhe Osimhen. Ne e duam në skuadër”.

Osimhen, i cili sezonin e kaluar u aktivizua për pak kohë te Galatasaray në huazim, është objektiv madhor i kampionëve të Turqisë. Bisedimet me Napolin kanë përparuar dukshëm në ditët e fundit. Fillimisht, oferta e Galatasarayt nuk i kalonte 60 milionë eurot, por tashmë klubi është i gatshëm të plotësojë kërkesën e napolitanëve, duke ofruar 75 milionë euro.

Pika e vetme që ende diskutohet mes dy klubeve lidhet me mënyrën e pagesës. Napoli dëshiron tre këste, ndërsa Galatasaray preferon të paguajë shumën në pesë këste. Megjithatë, marrëveshja pritet të mbyllet me sukses.