E përditshmja zvicerane, Neue Zurcher Zeitung ka risjellë në vëmendje profilin e Zana Avdiut, aktivistes shqiptare, që trazoi shoqërinë kosovare me komentet e saj për futbollistin Granit Xhaka.

Siç shkruan sot NZZ, aktivistja është e urryer nga bashkatdhetarët e saj jashtë vendit – përfshirë edhe ata në Zvicër.

Sidomos pasi ajo kritikoi publikisht kapitenin e kombëtares zvicerane, Granit Xhaka.

Në titullin e artikullit të sotëm të NZZ, i cili përmban një podcast të gazetarëve zviceranë në Kosovë, shkruhet: “Aktivistja Zana Avdiu denoncon maçizmin në shoqërinë kosovare, shumë mendojnë se ajo meritonte të vdiste për këtë”.

Çka kishte ndodhur?

“Tensionet ishin ndezur në stadiumin e futbollit në Kupën e Botës në Katar, në dhjetorin e vitit 2022. Kombëtarja e Zvicrës ndodhej në fushë në fazën e grupeve kundër Serbisë. Atmosfera është edhe më e ngarkuar sepse shumë lojtarë të kombëtares së Zvicrës i kanë rrënjët në Kosovë. Edhe kapiteni Granit Xhaka. Momenti është i shkurtër, por do të linte gjurmë në faqet e para të së nesërmës: Xhaka kap organin gjenital dhe shikon drejt baniken serbe. “Një provokim”, shkruan Neue Zurcher Zeitung.

Në Kosovë ai lavdërohet nga shumë për këtë gjest. Por jo nga Zana Avdiu. Aktivistja e rrjeteve sociale merr celularin dhe publikon një postim ku kritikon gjestin maço të Xhakës.

Ajo e sjell këtë kritikë në një emision televiziv po atë mbrëmje. Por më pas vjen një telefonatë – një nga kosovarët më të famshëm jashtë vendit: Raqip Xhaka, babai i futbollistit, mbron publikisht gjestin e djalit të tij – dhe fyen Zana Avdiun. Në fund kërcënon se duhet të ketë kujdes.

Siç vazhdon shkrimi i NZZ-së, Zana Avdiu më pas do të kishte nevojë për mbrojtje policore në muajt e ardhshëm. Kërcënimet me vdekje që ajo merr janë masive. Por Avdiu i injoron. Nuk është se ajo ka frikë të thotë mendimin e saj.

“Kjo e bën atë të papëlqyeshme, veçanërisht në mesin e kosovarëve jashtë vendit, në mesin e diasporës”, thotë gazetarja zvicerane Katharina Bracher në episodin e fundit të podkastit “NZZ Kompakt”. Ajo u takua me Avdiun në Prishtinë. Qëndrimet e saj shpesh feministë dhe kritikat e saj ndaj qeverisë dëgjohen nga shumë, por nuk janë të mirëpritura nga të gjithë.