Agim Vinca

Në sallën luksoze
të Grand Hotelit
kthejnë çdo ditë.
Në mëngjes,
në mbrëmje,
në mesditë.
Pinë kafe. Duhan. Uiski.
Nga honoraret.
Në tryezat e rrumbullakëta
në formë sofre
Bisedojnë për artin, letërsinë
Me oreks poetik.
Bodlerin e hanë për drekë.
Rembonë për darkë.
Migjeni s’u del as për meze.
Në sallën luksoze
të Grand Hotelit
i takon çdo ditë.
Narcisë pa fytyra
Argusë pa sy
me shikim të vëngërt.

Në sallat luksoze të Grand Hotelit.

1987