Gucati: Propozimaktakuza ndaj krerëve të UÇK-së, sulm direkt mbi Kosovën dhe luftën e saj
Kryetari i Organizatës së Veteranëve të Luftës së UÇK-së, Hysni Gucati, ka thënë se aktakuza e dorëzuar nga Prokuroria e Specializuar në Hagë kundër presidentit Hashim Thaçi dhe kryetarit të PDK-së, Kadri Veseli është e papranueshme.
“Jemi mbledhur anekënd Kosovës në kushte dhe rrethana të jashtëzakonshme për të kundërshtuar akuzat e padrejta dhe të njëanshme, të ndikuara politikisht nga një pjesë e bashkësisë ndërkombëtare që po i bëhen UÇK-së tash e 20 vite të orkestruara edhe nga Serbia edhe nga aleatët e saj”
“Shpallja e pazakontë e akuzave ndaj krerëve të UÇK-së e befasoi botën qytetare. Veprimi i prokurorit i pamatur dhe i padrejtë i cili për të ushtruar presin publik ka lëshuar deklaratën para se gjykata të konfirmoj ose rrëzoj akuzën e ngritur”, ka thënë Gucati gjatë protestës se organizuar nga veteranët e UÇK-së.
Më tutje, ai ka thënë se Gjykata Speciale është e papranueshme, e njëanshme dhe e dyshimtë.
“E themi me bindjen të plotë se kjo gjykatë po bën gabim të pafalshme me ngritjen e kësaj aktakuze. Gjykata dhe drejtësia me këto aktakuza ndaj krerëve të UÇK-së po e vë në lajthitje autoritetin e vet. E themi me bindje të plotë se kjo gjykatë po bën gabim me ngritjen e këtyre aktakuzave”, ka thënë Gucati.