Guvernatori i BQK-së: Qeveria e re ta ketë prioritet zhvillimin ekonomik

23 shkurt 11:37

Guvernatori i Bankës Qendrore të Kosovës (BQK), Fehmi Mehmeti, ka thënë se sektori bankar ka pasur dhe vazhdon ta ketë rolin e saj në rimëkëmbjen ekonomike të Kosovës.

“Sektori bankar është mirë i kapitalizuar dhe likuid. Ky sektor e ka ndihmuar shumë ekonominë edhe gjatë kohës së pandemisë. Bankat kanë dhënë kredi mbi 1,5 miliardë euro gjatë pandemisë, kemi reni të normave të interesit bankar dhe kjo ka ndihmuar shumë. Ky sektor ka kapacitet të luan rol kyç për rimëkëmbje ekonomike pas pandemisë”, ka thënë ai në “RTK”.

Mehmeti ka thënë se në Kosovë edhe kreditë e këqija janë të vogla.

“Kreditë jo performuese janë në nivel mjaft të ulët, edhe gjatë pandemisë kanë qenë 2.7 për qind”, është shprehur ai.

Sipas tij një sektor financiar stabil krijon mundësi që të përballojmë problemin me pandeminë.

Mehmeti ka bërë me dije se BQK-ja ka marrë vlerësime pozitive nga institucionet ndërkombëtare, përfshirë FMN, Komisionin Evropian etj.

Ai ka përmendur veprimet që i kanë marrë gjatë periudhës së pandemisë që efektet të jenë sa më të vogla, duke veçuar ristrukturimin e kredive.

Guvernatori  Mehmeti, ka folur edhe për diasporën në raport me ndihmën që ajo jep për Kosovën.

“Vizita e diasporës në Kosovë paraqet një burim shumë të rëndësishëm për ekonominë e vendit. Vetëm shpenzimet jorezidente që ne i konsiderojmë që kryesisht realizohen prej bashkatdhetarëve tanë, kemi një rënie diku rreth 52.9 për qind krahasuar me vitin 2019, pra të shpenzimeve jo rezidente të realizuara në Kosovë që kanë arritur në vlerën 589.7 milionë euro. Ndërkaq, një vit më herët ka qenë 1.2 miliard euro”, ka thënë ai.

Sipas Mehmetit, remitencat vitin e kaluar kanë arritur vlerën e afër 1 miliard euro. Ai ka vlerësuar se nëse shkojnë punët mirë me vaksinim, atëherë rritja ekonomike në fund të vitit do të jetë 4 për qind.

Guvernatori i Bankës Qendrore të Kosovës (BQK), Fehmi Mehmeti, ka deklaruar se qeveria e ardhshme duhet të ketë fokus zhvillimin ekonomik.

Lajme të sponsorizuara

Të fundit
Marrëveshjet shtesë për të siguruar stoqe vaksinash nga vendet e…