Kryetari në detyrë i AAK-së, Ramush Haradinaj, ka përkujtuar sot martirët dhe dëshmorët e Gjakovës. “Fillimi i prillit ishte i kobshëm për Gjakovën. Armiku nuk kurseu as foshnjat, fëmijët, gratë e pleqtë. Vetëm pse ishin shqiptarë që jetonin në trojet e veta, ata përdoren metodat më barbare ndaj tyre”, ka shkruar Haradinaj në llogarinë e vet në “Facebook”.

Teksti përkujtimor i tij:

Fillimi i prillit, ishte i kobshëm për Gjakovën.

Armiku nuk kurseu as foshnjet, fëmijët, gratë e pleqtë. Vetëm pse ishin shqiptarë që jetonin në trojet e veta, ata përdoren metodat më barbare ndaj tyre.

Sot kujtojmë Martirët e Lirisë që u sakrifikuan në shtëpinë e familjes Vejsa: Fetije Vejsa, Shahindere Hoxha, Flaka Hoxha (15 vjeçare), Tringa Hoxha Vejsa me fëmijët e saj Rita (2 vjeçare), Arlindi (5 vjeçar), Marigona (9 vjeçare) dhe Dorina (11 vjeçare); Valbona Vejsa me fëmijët, Doruntinën (3 vjeçare), Egzonin (5 vjeçar) dhe Rinën (7 vjeqare); Valbona Byci-Caka me tri vajzat e saj Dionën (2 vjeçare), Delvinën (7 vjeçare) dhe Dalinën (14 vjeçare);Hysen Gashi, Mandushe Nuqi e Shirine Nuqi.

Kujtojmë Martirët e Lirisë që u sakrifikuan në pjesë të tjera të Gjakovës: Rexhë Gucin, Xajë Kurtin, Shukri Haxhiajn, Mazllom Kavajën, Sulejman Gërçarin së bashku me tre djemtë e tij (Skënderin, Haxhiun dhe Albertin), dy vëllezërit Dylatahu (Skënderin e Naserin), Melaim Qarkaxhiun, Blerim Bërdoniqin, ndërsa e plagosën rëndë Bujar Tetricën e që vdiq nga plagët.

Kujtojmë Martirët e Lirisë, vëllezërit Hasan e Adem Haxhia, djemtë e Ademit Berati e Gëzimi dhe gruaja e Hasanit Myzafere Haxhia, Afërdita Deda-Demjaha me të birin Argjentin.

Kujtojmë familjen që u shua, pa lënë pasardhës, familja e Januz Canës, gruaja e tij Ganimetja, vajza Shpresa dhe djali Fatmiri, familje që pasi u masakrua u dogj së bashku me shtëpinë.

Zjarri që u ndez, simbolizoi lirinë e Kosovës. Liri që e paguam shumë shtrenjtë.

Po ashtu kujtojmë me krenari demonstratat gjithëpopullore të fillim prillit të vitit 1981, që ishin fillimi i shkatërrimit të Jugosllavisë.

Mobilizimi i madh i rinisë shqiptare, tregoi etjen e popullit për liri e barazi.

Sot nderojmë gjakun e Dëshmorëve që ranë: Naser Hajrizi Asllan Pireva, Xhelal Maliqi, Salih Abazi, Salih Zeka, Ruzhdi Hyseni, Rizah Matoshi, Sherif Frangu, Nesimi Dervishdana, Rizah Matoshi, Salih Abazi, Salih Zeka, dhe Ruzhdi Hyseni.

Sakrificën e tyre e nderoi me beteja Ushtria Çlirimtare e Kosovës.

Liria erdhi, e ata do mbesin përhershëm në kujtesën tonë.

Lavdi!

RH