Deputeti i Partisë Demokratike të Kosovës (PDK), Enver Hoxhaj, ka kërkuar nga kryeministri Albin Kurti që të kërkojë falje për siç ka thënë ai dhunën e ushtruar në Kuvend gjatë kundërshtimit të marrëveshjes për Asociacionit në vitin 2013, kur Kurti ishte opozitar.

“Po ashtu duhet të tërhiqeni nga të gjitha ato etiketime që iu keni bërë njerëzve duke i cilësuar si tradhtarë”, ka thënë Hoxhaj.

Për më shumë,  Hoxhaj ka deklaruar se Kurti ishte i sinqertë gjatë prezantimit të çështjes së dialogut.

“Mendoj që kryeministri ishte shumë i sinqertë me ne. Por jam i tmerruar nga ajo që dëgjova nga sinqeriteti i tij, sepse kam pasur pritje të tjera që dialogu do të duhej t’i sjellë Republikës së Kosovës”, ka thënë Hoxhaj.

Ai ka deklaruar se Serbia vazhdon të jetë shtet armiqësor me Kosovën, duke shtuar se procesi i dialogut ka qenë i vështirë gjithmonë.