Në prani të kryeministrit të Kosovës, Avdullah Hoti, ministri i Infrastrukturës, Arban Abrashi, ka nënshkruar projektin për rehabilitimin e rrugës “Hyrja në Qytetin e Ferizajt”, që është kredi nga Banka Evropiane për Rindërtim dhe Zhvillim, raporton “Epoka e re”.

Ministri Abrashi ka thënë se ky projekt do të ketë impakt në zhvillimin ekonomik të Ferizajt, duke bërë edhe më të lehtë qasjen për qytetarët. “Falënderoj të gjithë ekipin e BERZH-it për bashkëpunimin e treguar. Ky është një projekt i ri që do të ndikojë në zhvillimin ekonomik të Komunës së Ferizajt dhe rruga do t’i ketë katër korsi me të gjitha standardet përcjelljes. Ne sot nënshkruam kontratën dhe në kohë rekorde do të përfundohet punimet, duke e kthyer Ferizajn në qytet model në infrastrukturë”, ka thënë Abrashi.

Drejtori i BERZH-it në Kosovë, Neil Taylor, ka theksuar se është shumë i lumtur të shoh që po nënshkruhet kjo kontratë.

Ai ka shtuar se projekti ka gjatësi 5.6 kilometra, që do ta ketë të gjithë infrastrukturën përcjellëse.

Realizimin e projektit e ka fituar kompania italiane “INC”, që në emër të saj e nënshkroi kontratën, Claudio Dogliani.

Në ceremoninë e nënshkrimit ishte edhe ambasadori i Italisë në Kosovë, Nicola Orlando.

Projekti parasheh të përfundojë në janar-shkurt të vitit 2023, që i bie 24 muaj nga dita kur fillojnë punimet.

Gjatësia e projektit është 5.6 kilometra me katër korsi dhe do ta ketë ndriçimin, trotuaret dhe të gjitha standardet.