Ish-avokati i Trumpit pranon se e ka gënjyer Kongresin

29 nëntor 17:07

Ish-avokati i presidentit amerikan, Donald Trump, Michael Cohen është vetëshpallur fajtor se ka gënjyer Kongresin në lidhje me hetimin që ka të bëjë me ndërhyrjen ruse në zgjedhje.

Coheni, 52 vjeç, ka pranuar në gjykatë se kishte keqinformuar ligjvënësit mbi projektin e pasurive të patundshme të Trumpit në Moskë. Ai është shfaqur krejt papritur në një gjykatë federale në Manhattan, gjatë mëngjesit të kësaj të enjteje.

Në gusht, Coheni ka pranuar fajësinë edhe për shkeljen e ligjeve financiare gjatë fushatës presidenciale të vitit 2016, duke paguar të holla në këmbim të heshtjes së ish-të dashurave të pretenduara të Trumpit.

Zhvillimi i kësaj të enjteje është kthesa e fundit e ndodhur në hetimin e kryesuar nga këshilltari special i Departamentit të Drejtësisë, Robert Mueller, mbi faktin nëse Trump dhe rrethi i tij i ngushtë i bashkëpunëtorëve kanë bashkëpunuar me Rusinë, në përpjekje për të ndikuar në zgjedhjet presidenciale të vitit 2016.

Teksa po largohej nga Shtëpia e Bardhë për t’u nisur drejt Buenos Airesit për samitin e G20-s, Trump u ka thënë reporterëve se Cohen ishte “një person i dobët dhe aspak i zgjuar”, i cili po “gënjente” me synimin për të reduktuar dënimin e tij.

Coheni ka pranuar fajësinë në gjykatë, për një vepër penale që ka të bëjë me dhënien e një deklarimi të rremë përpara Kongresit, në hetimin e këtij të fundit mbi faktin nëse drejtuesit e fushatës së Trumpit kanë punuar me Rusinë për të diktuar rezultatin e zgjedhjeve të dy viteve më parë në ShBA.

Lajme të sponsorizuara

Të fundit
Këshilltari i kryeministrit Ramush Haradinajt, Avni Arifi, u ka bërë…