Ish-kryeprokurorit shqiptar i ndalohet hyrja në ShBA

15 shkurt 2018 | 10:35

Departamenti Amerikan i Shtetit (DASh) ia ka ndaluar ish-prokurorit të përgjithshëm, Adriatik Llalla dhe familjes së tij hyrjen në Shtetet e Bashkuara të Amerikës (ShBA).

Vendimi i DASh-it ka theksuar se vet sekretari i Shtetit, Rex Tillerson, e ka miratuar masën e ndalimit për shkak të përfshirjes së ish-zyrtarit shqiptar në raste të mëdha korrupsioni.

Ligjet amerikane parashikojnë që në rastet kur ka informacione të besueshme se zyrtarë të huaj përfshihen në raste madhore korrupsioni ose në shkelje të rënda të të drejtave të njeriut, këtyre individëve dhe familjes së tyre të afërt u ndalohet hyrja në ShBA.

Ligji po ashtu parashikon që Sekretari i Shtetit ka të drejtë që sanksionet ndaj këtyre individëve dhe familjeve të tyre t’i miratojë privatisht ose publikisht.

Përveç Llallës, shefi i diplomacisë amerikane ka miratuar ndalimin e hyrjes në Amerikë edhe të bashkëshortes Ardjana Llalla, të vajzës Eni Llalla dhe një fëmije tjetër të tij që nuk ka shtetësinë amerikane, raporton “TCh”.

Shkurtin e një viti më parë, kur ishte ende kryetar i organit të akuzës, Ambasada Amerikane në Tiranë i anuloi Llallës dhe së shoqes vizën diplomatike, veprim ky të cilin ish-kryeprokurori e priti me indinjatë të thellë e i dërgoi dhe një letër-ankesë presidentit.

Por, ambasadori amerikan në Tiranë, Donald Lu e ka bërë të qartë pak ditë më parë se historinë e Llallës nuk do ta mbyllë as kërkesa e tij për të mos qenë më pjesë e sistemit të drejtësisë, e për pasojë, nuk mund të jetë subjekt Vettingu.

Fjalët Kyçe:

Lajme të sponsorizuara

Të fundit
Bisedimet mes Shkupit dhe Athinës për çështjen e emrit janë…