Pas vendimit për largim nga institucionet e Kosovës, kanë dhënë dorëheqje edhe kryetarët e komunave veriore, Mitrovicë e Veriut, Zveçan, Leposaviq dhe Zubin Potok.

Përpos kryetarëve, dorëheqje kanë dhënë edhe këshilltarët në kuvendet komunale nga radhët e Listës Serbe, raportojnë mediat lokale serbe.

Kujtojmë se një ditë më parë, Lista Serbe njoftoi për largimin e serbëve nga institucionet e Kosovës.

Në pjesën veriore të Mitrovicës sot në orën 12 do të mbahet një takim i përgjithshëm publik.

Paralajmërimet e Listës Serbe për largim nga institucionet e Kosovës kanë ardhur pas vendimit të autoriteteve të Kosovës për suspendimin e drejtorit të Policisë së Kosovës për rajonin e veriut, Nenad Gjuriq, i cili ka refuzuar që të zbatojë vendimin e Qeverisë së Kosovës për riregjistrimin e makinave që kanë targa të lëshuara nga Serbia në RKS – Republika e Kosovës.