Superliga e Kosovës në futboll rikthehet sot me dy ndeshjet hapëse të javës së 20-të. Në stadiumin “Zahir Pajaziti”, KF Llapi do të jetë nikoqir i FC Prishtina.

Llapjanët aktualisht renditen në vendin e tetë, në zonën e barazhit, me 32 pikë, ndërsa prishtinasit mbajnë pozitën e tretë me 43 pikë. Në ndeshjen tjetër të ditës, FC Ferizaj përballet me FC Prishtina e Re, në një duel direkt për mbijetesë.

Ferizaj ndodhet në vendin e shtatë me 32 pikë, ndërsa Prishtina e Re mban vendin e fundit me 27 pikë dhe ka nevojë urgjente për fitore për të mbajtur gjallë shpresat për mbijetesë.

Të dyja ndeshjet zhvillohen sot duke nisur nga ora 15:00.