Kryeministri i Sllovenisë, Miro Cerar, ka dhënë dorëheqje pas anulimit nga Gjykata Supreme të një referendumi që i hapte dritën jeshile projektit ambicioz hekurudhor Koper-Divaça, i mbështetur nga qeveria e qendrës së majtë.

Cerari do të informojë sot edhe presidentin e vendit, Borut Pahor për këtë vendim.

Referendumi i anuluar është zhvilluar shtatorin e kaluar dhe kërkonte miratimin popullor për ndërtimin e një linje të dytë hekurudhore mes Divaças dhe Koperit, që Cerar e kishte konsideruar të një rëndësie strategjike për Slloveninë.

Sipas Gjykatës Supreme, mbështetja e Qeverisë për këtë projekt mund të ndikonte në zgjedhjet parlamentare që do të zhvillohen qershorin e ardhshëm.