Sot në Junik është mbajtur protestë në lokacionin ku po zhvillohen punimet jashtëligjshëm dhe në devijim të rrjedhës natyrore të lumit Erenik.

Protesta përcolli mesazhin e qytetarëve dhe komunës së Junikut që në asnjë rast nuk kanë qenë, nuk janë dhe nuk do të jenë që shtëpitë e qytetarëve të Rekës e Lugut të mos kenë ujë të pijes, që është një e drejtë njerëzore, natyrore e garantuar me çdo normë kushtetuese e ligjore, të cilën qytetarët e Junikut e kanë dëshmuar me shekuj e dekada në robëri e varfëri.

Edhe njëherë kryetari i komunës së Junikut, Agron Kuçi, nga vendi ku KRU-Gjakova jashtëligjshëm është duke vazhduar punimet, i ka bërë thirrje kryeministrit të Kosovës, njëherësh edhe kryetar i Këshillit Ndërministror të Ujërave, Ramush Haradinajt, që sa më parë të shfuqizojë vendimet e paligjshme të MMPH-së, t’i ndalon të gjitha veprimet e paligjshme të komunës së Gjakovës dhe që KRU Gjakova të veprojë ligjshëm me drejtësi dhe në interesin e përgjithshëm.

Kryetari Kuçi ka bërë me dije se komuna e Juniku do t’i shfrytëzojë të gjitha mjetet ligjore dhe demokratike në mbrojtje të pasurive kombëtare, në këtë rast si për lumin Erenik, natyrën, mjedisin ekologjik dhe biodiversitetin.

/Epoka e re/