Pas dështimit të votimit të qeverisë në Kuvend më 26 tetor, Instituti Demokratik i Kosovës (KDI), ka vlerësuar se procesi ka hyrë në ditët e fundit të fazës së dytë, siç përcaktohet me nenin 95.4 të Kushtetutës së Kosovës.

Në këtë periudhë kur është nominuar Glauk Konjufca për kryeministër nga Vetëvendosje,  KDI-ja ka theksuar se presidentja e vendit, Vjosa Osmani, ka pasur obligim që brenda afatit dhjetëditor, pra deri nesër të zhvillojë konsultime me të gjitha partitë parlamentare, me qëllim të vlerësimit të gjasës reale për formimin e një shumice të re qeverisëse dhe shmangies së zgjedhjeve.

KDI-ja ka vlerësuar se për të siguruar integritet dhe besueshmëri të këtij procesi, është thelbësore që të gjitha hapat e presidentes Osmani të jenë transparentë dhe arsyeshëm, duke përfshirë publikimin paraprak të kritereve mbizotëruese që do të udhëheqin vlerësimin e “gjasës më të madhe për formim të shumicës”, si dhe sqarimin e formës përmes së cilës do të kërkohet dhe verifikohet mbështetja në Kuvend.

“Këto kritere janë garanci substanciale të paanshmërisë dhe respektimit të rendit kushtetues. Prandaj, transparenca lidhur me të njëjtat është e rëndësisë parësore për të ruajtur besimin publik në funksionimin demokratik dhe kushtetues të institucioneve”, është thënë komunikatën për medie të KDI-së.